مرضه بحبك وحبك شفانه
وتسامرنه ولا واحد شفانه
تذكر يوم من طبكن شفانه
احس ارض وسما صارن سوي
ــــــــــــــــــــــــــــــــــــــــــــــ
انا الصياد صادتني شبكتك
دخيل الله شكثر حلوه شبكتك
ادك عليك مشغوله شبكتك
اظن مغلق جهازك بس عليه
ـــــــــــــــــــــــــــــــــــــــــــــ
المحبـــوب أفكر ليـــل وانهار..
ودمع عيني بغيابك بحر وأنهار..
جبل آنه بمحبتك طاح وأنهار..
لأن حبك زلازل ومر عليه...
ــــــــــــــــــــــــــــــــــــــــــ
انه كلبي لغير حبك ابد مختار
وحبك صار على شخصي مثل مختار
انه راح اجدد بحبك ثورة عمرمختار
ومن هسه اكلك فايز انه بيهه..
ــــــــــــــــــــــــــــــــــــــــــــ
فصوص العين فص يمي وفص لك
يامن يوسف انت اصلك وفصلك
اخيطك بيدي تدريني وافصلك
واجيبك فيت يالترهم عليه
ــــــــــــــــــــــــــــــــــــــــــ
موهذه البدايه وانت قبله
واليقبلك من وجنتك انت قبله
صرت صومي وصلاتي وانت قبله
وفرض سادس صرت انته عليه
ـــــــــــــــــــــــــــــــــــــــــ
كلبي اشما اطشره يرد صامت
وروحي من حزنهه اعليك صامت
شما اخلي الجهاز بوضع صامت
يصرخ من تدك انت عليه
ــــــــــــــــــــــــــــــــــــــ
صعت وانه بجزيره ومره صيدك
ومره انت صدتني ومره اصيدك
دولار واحد دصرف من رصيدك
دولارين ادزلك بس حن عليه
ـــــــــــــــــــــــــــــــــــــ
العشك يكتل ياصاحب وانته داري
هاك الكلب يمك وانته داري
انته اهلي وعمامي وانته داري
وانته امي وابوي وخال اليه
ــــــــــــــــــــــــــــــــــــــ
لاذ بكلبي شوكك وانتقل بيه
صعد للراس حبك وانتقل بيه
احب اشلون غيرك وانته قلبي
وانه بكلبي احبن مو بديه
ــــــــــــــــــــــــــــــــــــــــ
اذا لجلك فديت الروح من دم
عليك العين تهمل دمع من دم
واذا عمري كضيته وياك من دم
لان طبعك حلو ونفسك ابيه
ــــــــــــــــــــــــــــــــــــــــ
صورتك ملك نسخه من جمالك
يال محمل ذهب لولي من جمالك
اون واصفن واتعب من جمالك
لو فتت بالمنطقه اطكلك تحيه
ـــــــــــــــــــــــــــــــــــــــ
بمشيتك مااظن يمشي ملازم
وحسنك منكتب عنه بملازم
حبيبي لاتحط احمر ملازم
شفتك والورد صارن سويه
ـــــــــــــــــــــــــــــــــــــ
روحي وي الصبر بجفاك جلده
ومنو مثلك حرير اللمس جلده
اتعاقب وانضرب ستين جلده
وبس وياك كعده اتصير اليه
ـــــــــــــــــــــــــــــــــــــــ
تره الواشي عرف سرنه وشاعه
وابد لتظن حبي جذب واشاعه
انه لكلبي خذت صوره واشاعه
طلع مكتوب احبك للمنيه
ـــــــــــــــــــــــــــــــــــــــ
الك دوم اتعنه واصل بيك
وعنادك وين يبنادم وصل بيك
حبيبي وشايل بجيبي وصل بيك
وباجر بيك انه مطلع هويه
ــــــــــــــــــــــــــــــــــــــ
عنيت وبس عليك الجدم يعني
ولاغيرك الي بالناس يعني
اكله اشكد تحبني يكلي يعني
شنو اليعني منو يفسرهه اليه
ــــــــــــــــــــــــــــــــــــــــــــ
غرامك اثر بالعشك وداره..
هجرت الي تعب وياك وداره..
سمعت بقيس عاف اهله وداره..؟
حملت الضيم وهمومك سويه
ــــــــــــــــــــــــــــــــــــــــــــــــ
صرت كهوه لحبيبي بوسط فنجان
فن انس الي يوصله فن جان
اذا العاقل نضرلك نضره فنجن
وانه المجنون وتكلي انظر اليه
ـــــــــــــــــــــــــــــــــــــــــــــــ
حلو إسمك وأبوك شلون سماك
حبيبيك لو زعل وياك سماك
صرت سمچه وانت الصرت سماك
لو طحت بحنانك إعطف عليه
ـــــــــــــــــــــــــــــــــــــــــــــــ
جنت انت المرض وانت دوالي
وصارت بالجدم منك دوالي
اهديتك گلبي وتگلي دولي
وصرت دم ودمع تذرف عليه
ـــــــــــــــــــــــــــــــــــــــــــــــــ
جمر دمعي عله خدودي ترى سال
كطعََّتّّّّ اخبارك حبيب تراسل
انه انسليت من هجرك ترى سل
وتون الروح وتريد المنيه
ــــــــــــــــــــــــــــــــــــــــــــــ
يمرمرني ويصيحن بيه همال
وترك دمعي عله الوجنات همال
تعدل حالي وبفركاه هم مال
تركني وراح ريته يعود اليه
ــــــــــــــــــــــــــــــــــــــــــــــ
زماني شما لعب بيه...ولهتم
والراده علي يسري...ولهتم
بروحي شماتغيرتوا...ولهتم
لان حبكم دوه لكل مرض بيه
ــــــــــــــــــــــــــــــــــــــــــ
فراكك هدني ولا خله بيه ابد حيل
وياهو اشكيله يكلي يستاهل والف حيل
كلما تدوس على كلبي اكولن بعد حيل
دوس وخلي الوجع يزداد بيه
ــــــــــــــــــــــــــــــــــــــــ
جيتك وبظلام الليل ...عناي
وعزفت بروحي مية جرح...عناي
بعد ما ظنك تنشد...عناي
بعد هجرك يروح الروح اليه
ــــــــــــــــــــــــــــــــــــــ
قلم كلــــبي تداين ورقه منك .....
لأن ماكو بجمالك ورقه منك .....
باسجلك انت الأول ورقمنك ....
وأكتب لافته محجوز اليه
الرئيسية
موضوع: اجمل ابو ذات الغزل